Sonetos
On marzo 8, 2017 | 0 Comments
  • img-book

    William Shakespeare

Sonetos

William Shakespeare

William Shakespeare, el mayor dramaturgu de la lliteratura universal, creador de mitos tan potentes como Hamlet, Otelo, Macbeth, Ricardo III o Romeo y Xulieta, foi tamién un poeta estraordinariu; el traductor Héctor Fernández escribe a propósitu de los sos Sonetos: «Lo más llograo, lo más sutilmente trabayao, lo más plenamente humano del talentu lliterariu de Shakespeare ta na preciosa y precisa complexidá d’estos versos». Editaos por Thomas Thorpe en 1609, publicamos agora n’asturianu esos 154 sonetos coincidiendo colos 400 años de la muerte del so autor. Lo poco que se sabe de la vida de William Shakespeare (Stratford-upon-Avon, 1564-23 d’abril de 1616) quixo compensase faciendo por lleer esta obra en clave autobiográfica, intentando desvelar inútilmente quién son l’apuestu mozu, la dama escura y el poeta rival a los que se dirixe nestos versos. El tema central d’estos poemes ye la pasión amorosa, entellazáu cola preocupación pol pasu del tiempu y la muerte, reflesiones sobre la belleza, la llealtá y la política, too ello con un tratamientu lliterariu que supera la tradición petrarquista y antecipa una nueva poesía amorosa moderna.

Héctor Fernández (Lluanco, 1968) ofrez una versión axustada y escepcional de la poesía shakespeariana, dando tresláu en tridecasílabos blancos asturianos los versos ingleses. Traductor d’Auden y de los poetes modernistes norteamericanos (Frost, Stevens, Williams, Fletcher, H. D., Moore, Ransom, Cummings, Crane, Oppen), tien publicaos dos llibros propios de poesía: Les inciertes aveníes del tiempu (2007) y Dellos fechos na vida d’Alexander Waters (Saltadera, 2015).

25.00

Cantidad:
Conoce al autor
avatar-author
William Shakespeare
Poeta, dramaturgu, comediógrafu, actor y empresariu teatral inglés, nació en Stratford-upon-Avon en 1564 onde morrió’l 23 d'abril de 1616. Dedicó la so primer obra, el poema Venus and Adonis  (1593), al conde de Southampton, y al añu siguiente dedicó-y tamién el so segundu poema, The Rape of Lucrece. Los Sonets fueron publicaos por Thomas Thorpe en 1609. En 1611 dexó de ser actor y retiróse a Stratford. Tuviera n’escena venti años, creando la serie más grande d'obres teatrales y el más maraviyosu conxuntu de personaxes que concibiera un solu home na historia del mundu. Ta enterráu nel presbiteriu de la parroquia de Stratford. El 1623 dos de los sos compañeros de teatru, Heminges y Condell, publicaron les sos obres teatrales. Les sos traxedies esquicen les recóndites solombres de la pasión y los perennes enigmes de la condición humana.
Libros de William Shakespeare
Sobre este libro

Leave a reply