La Hestoria universal de Paniceiros, crónica emocional d’un territoriu yá míticu, ye una metáfora del mundu. El pueblu que da nome a estos relatos tien una doble dimensión: la real, el llugarín de l’alta sierra de Tinéu que formen un puñáu de cases, y la intelectual, una potente creación que Xuan Bello fai capital d’un territoriu lliterariu propiu. Nesti espaciu narrativu xúntense la realidá y la ficción, lo local y lo universal, la vida y la muerte, ensin que falten figures lliteraries a les que Bello da carta de vecindá: Cernuda, Quasimodo, Casariego, Borges, Cunqueiro, Drudak…
Xuan Bello (Paniceiros, 1965), Premiu Nacional de Lliteratura 2017, ye la voz más universal de les lletres asturianes. Poeta, narrador y traductor, empieza publicando poesía en 1982, Nel cuartu mariellu, al que siguen Llibru de les cenices (1987), Los nomes de la tierra (1991), El llibru vieyu (1994), Los caminos secretos (1997) y El llibru nuevu (2017). En 2002 aparez Historia universal de Paniceiros, la obra narrativa que-y da proxección peninsular, tres de la que vienen Los cuarteles de la memoria (2003), Meditaciones nel desiertu (2003), La nieve y otros complementos circunstanciales (2007), Al dios del llugar (2007) o Unas poucas cousas guapas (2009) ente otros títulos.
Con esta nueva edición de la exemplar Hestoria universal de Paniceiros damos empiezu a la publicación ordenada de la obra en prosa, n’asturianu, d’esti autor.
