Xuan Xosé Sánchez Vicente
On marzo 8, 2017 | 0 Comments

Xuan Xosé Sánchez Vicente naz en Xixón en 1949. Llicenciáu en Filoloxía pola Universidá d’Uviéu ye catedráticu xubiláu d’institutu. Funda en 1975 xunto con Xosé Lluís García Arias y Lluís Xabel Álvarez l’asociación Conceyu Bable cola que se pon en marcha’l Surdimientu. A la so temprana acción política débense-y dalgunes importantes iniciatives culturales, como la creación del Muséu de Belles Artes d’Asturies, la Orquesta Sinfónica d’Asturies, el complexu cultural alredor de la cueva Tito Bustillo, la convocatoria del primer premiu de novela n’asturianu (l’actual Xosefa Xovellanos) o del Día de les Lletres Asturianes. Miembru fundador de l’Academia de la Llingua Asturiana, ocupa ún de los sos sillones como numerariu. En 1984 crea’l Partíu Asturianista, del que va ser l’únicu presidente, llogrando por esta formación un escañu na Xunta Xeneral ente 1991 y 1999. La so obra creativa, que lu convierte nuna de les figures esenciales de la lliteratura asturiana, avérase a la centena de llibros de mui distintes materies; tien escrito poesía: Camín de señardaes (1980), Poemes de Xixón (1981), De reidores costes  (1988), …Y de llastientes picos (1999), As de corazon/es/y/es (2001), De les hores y les memories (2015); novela: La muerte amiya de nueche (1984), No miréis al mar (2007),  Retrato de desposados con panamá a su frente (2010), Bajo el viaducto/Al pie del viaductu (2015); recopilaciones de cuentos: Cuentos de llingua afilada (1984), Lluna llena (1990), Azurriángamelamelonga (Segunda edición) (2011); teatru: El Pelayu (1985), Esta danza ye la vuestra, si ye que vos presta (1992); llibros infantiles, traducciones, ensayu políticu, lliterariu y llingüísticu… Foi editor y estudiosu de dalgunos de los clásicos de la lliteratura asturiana y autor de les sucesives ediciones de dos diccionarios imprescindibles: Diccionariu castellanu-asturianu (2008) y Diccionariu asturianu-castellanu (2009). Foi Premiu «Xosefa Xovellanos» de novela y «Xuan María Acebal» de poesía, d’ente los que convoca’l Principáu d’Asturies.

 


Llibros de Xuan Xosé Sánchez Vicente en Saltadera

El caballu de Francisco Bernaldo de Quirós y Benavides (2016; editor)

Leave a reply

  • Más novedades del blog